انت، يا شبه الرجّال، اللي ناقصك ترباية، انت اللي ما بتحترم وبتضرب وبتتعدّى، انت الولد والمعقّد والمنزوع، انت اللي مفكّر انّو انت اللي بتفهم والعالم كلّها برغش ودبّان.
لأيمتى رح تضلّ الدنيي سايبة؟؟ لنو أنا ما عمبفهم ليش انت حاسس انّو حقّك تضربا، انّو هي بنت شوارع وانت ابن قصور؟ انّو هي أهلا ما تعبو عليا تربوها تتصير شي يليق بمقام حضرتك؟ انّو تعى تخبرك شغلي، نهار الّي هيي بدّا تردّلك ياها، ما رح تتطر انها تضربك، بتعرف ليش؟ لأنو ما بتبل ايدا بهيك مستوىّ، أكبر أزعر بالبلد بياخد فيك خمسين دولار، بيكبّك جمعة بالمستشفى! لو كانت الرجولية بالضرب، منعلّما كاراتتيه للمدام، تنشوف ساعتها مين الرجّال بالبيت؟؟؟
انو فيي اسألك سؤال؟ ليش تجوزت؟؟ انو لو اشتريت كيس “بوكس” ما كان أشرفلك؟ ضلّك فش خلقك في من هلّق تألله يفرجا، وحلّ عنّا للمخلوقة! بتقلّي بتحبّا!!! أهلا، شو هالحبّ المشرشح هيدا، الاي كل ما دق الكوز بالجرة بتمدّ ايدك عليا؟؟
آل شو، آل “أنا راجع من الشغل معصّب ولقيتا مش طابخة والبيت مش نضيف”، ما بتخايل انو هال “البني آدم” ما بيحقلها تتكسلن يبوم من الايام! ومزعوج هالقد، طلوب ديليفيري، أو روح كول عند امّك، أوفر!
لأيمتى بدنا نضلنا شايفين المرا كوسيلة، وكخادمة، وطباّخة، منشوفا بكل أشكال الحيوانات بس ولا مرّة منشوفا كانسان بيفكّر وبيحسّ وبيعبّر!!!
ما فيني لومك الك كلّ الوقت، مجبورة لوما لالها، لأنا ضعيفة، ولأنا قبلانة فيك، ولأنا داعسة عكرامتا وعايشة معك! بتقلي غلطت!! بقلّك انت بتغلط بحقا خمس ألاف مرة بالنهار، بيكل مرة بتكش بوجا انت غلطان، بكل مرة بتتطلع بوحدة تانية انت غلطان، بكل مرة بتحكي عنا انت غلطان، كل مرة بيتخبر العالم انك ضربتا غلطان، بكل فكرة عاطلة اجت براسك عنا انت غلطان، بمجرد انّك مقتنع انّا بتستاهل تنضربأ انت ما بتستاهل ضفرا!!! ما بتستاهل الا مين يوقفك عند حدّك ويفهمك بالتي هي أحسن انّك “مجرم” مش بس بحقا، بحق حالك وبحق ولادك وبحق الحياة والدني كلها!
عقبال ما يصير هالبلد يحترم بناتو ويعطبن حقوقن، بركي بيصيرو يشدّوك عن التلفزيون انت وهلقد مبسوط بحالك وعمبتخبر انك ضربتا، ويكبوك بالحبس تتندم عالسّاعة اللي مدديت ايدك فيا على بنات الّناس!!!
No comments:
Post a Comment