يا صوتي ضلّك طاير، زوبع بهالضماير

خبّرهن عالّي صاير بركي بيوعى الضمير!

هيك غنّت فيروز، وهيك كلنا رح نحكي معا، ورح نعلّي صوتنا معا! يمكن ما يوصل، ويمكن يوصل والناس تسكر دينيا، بس رح نضل نجرب نوّعي هالضمير! وما رح نفقد الأمل، بركي بكرا بيصير أحسن من اليوم.

الليلة مش حابة احكي سياسة، الليلة رح خبركن عن لبنان، عن وطني، بس اليوم رح صوتي يحكي، ويخبر عن الوجع، وجع شعب كان حابب يعيش، كان متأمل باستقلال!

رح أوصفلكن شو صاير بوطني:

عالطرقات في ولاد عمبتشحد بين السيّارات، وما في وزارة تلمّن من بين السيّارات، وعجقة سير ما بتخف لا بالليل ولا بالنهار، بس الغريب انو وقتا بيمرق موكب سعادتو، بتفتح الطريق فجأة وبترجع بتعجؤ فجأة، يمكن هوّي سبب العجقة، مش عارفة!

بوطني بيعمرو جسورا بالمصاري اللي جابوها تيعمرو مكتبات ونوادي ثقافية، وقلال اللي سئلانين عن العلم، انو هوي العلم منيح للّي معو يتعلّم.

مبارح قصّو حديقة عامّة كانت حدّ بيتي تيعمرو بناية، وقتا دقّيت ع:”الخط السّاخن” تبع الوزارة، آلولي اذا معن رخصة ما فينا نمنعن.

بدكن تعرفو بعد؟

مقطوع المازوت بنص دين الشتويّة، والتوقعات الجوية بتقول جايي موجة سأعة من أوروبا بهالجمعة، والوزير صرّح انو ما في مازوت قبل جمعتين، ما بعرف هالشعب المعتر شو لازم يعمل.

الحدّ الأدنى للمعيشة بوطني : خمسمية ألف ليرة، ما بيقدو هالمسكين الطفران حق ربطة خبز وكباية حليب كل يوم، وبيقولولك بدنا ضرايب تنسكر قيمة الدّين! انو مين ألّن يتدينوا أنا ما عمبفهم!

شعبي بيزقّّف ليلّي صوتوا أعلى وليلّي بيدفع أكتر نهار الانتخاب، شعب مسكين طفران، وبيقعد يبكي عالأطلال….

الشباب ببلدي فلتو، ونسيو معنى الأخلاق، يمكن لأنن ما فهمو شو يعني حرية، والثقافة كرمالا بتنزل نزول، وصار اللي عندو ضمير يقولو عنو حمار والحرامي المجرم بيفرشولو سجاد أحمر.

سويسرا الشرق صار مزبلة الغرب بيكبو فينا كل اللي ما بدن يا، قلّة أخلاقن وسمّن وأمراضن، وبيدفنو ببحرتا زبالتن ومجاريرن.

بوابة الدول العربية صار الكباريه اللي بيجو عليها العرب تينبصتو ويغيرو جو!

وبلدي رايح عالانحطاط وأنا قاعدة هون عمخبركن، يمكن كل واحد منا صار لازم بعمل شي! بركي بيرجع لبنان بسمة بريئة صغيرة على هالكرة الأرضية الكبيرة.

أنا بقلمي بلّشت، بعلمي بلّشت، بثقافتي بلّشت!

انتا من وبن بدّك تبلّش؟؟؟؟

——–

تصبحون على وطن

Sarah R. Hajj

January 13, 2009